Экранда қазақ тілі неге болмады: Канье Уэст концертінің ұйымдастырушысы жауап берді

Канье Уэст концертінің ұйымдастырушылары қазақ тілінің экрандарда неге болмағанын түсіндірді, деп хабарлайды Sn.kz ақпарат порталы.

First Media Group негізін қалаушы Данна Қарағұсова Алматыдағы Орталық стадионда Канье Уэстің концерті кейінге шегерілгеннен кейін экрандарда қазақ тілінің болмауына байланысты туындаған дауға пікір білдірді.

Кеше көрермендерден концерттің кейінге шегерілуіне байланысты стадионнан шығу сұралды. Экрандарда нұсқаулықтар орыс, ағылшын және түрік тілдерінде көрсетілгенімен, мемлекеттік тілде ақпарат берілмеген. Көрермендердің айтуынша, қазақ тілінде хабарландыру да жасалмаған.

Қарағұсованың сөзінше, мұндай жағдай форс-мажорға байланысты туындаған. Ұйымдастырушылардың басты міндеті адамдарды стадионнан барынша жылдам әрі қауіпсіз шығару болған.

«Сол сәтте басқару пульті әртістің командасында болды. Пультте отырған адам қолында бар нұсқаулықтарды экрандарға барынша жылдам шығарды», – деп түсіндірді ол.

Қарағұсова қазақ тілінің болмауында ешқандай әдейі жасалған әрекет жоқ екенін, төтенше жағдайда басқа экрандарды дайындауға уақыт болмағанын айтты.

«Бірінші кезекте – адамдардың қауіпсіздігі. Болмаған жерден құрметсіздік іздемеулеріңізді сұраймыз», – деп жазды First Media Group негізін қалаушы.