КІАҒЗИ жүрек патологияларын емдеу тәсілін түбегейлі өзгертуге мүмкіндік беретін бірегей технологияларды белсенді енгізуде

Кардиология және ішкі аурулар ғылыми-зерттеу институтында Қытай Ғылым академиясының академигі, Чжэцзян университетінің Медицина мектебінің 2-ші ауруханасының президенті, профессор Wang Jian’an, MD және ультрадыбыстық зерттеу, DragonFly жүйесі мен клапандық интервенциялар бойынша жетекші мамандар – 3 проктордың қатысуымен митральды қақпақты транскатетерлік реконструкциялау бойынша шеберлік класы өтті, деп хабарлайды Sn.kz ақпарат порталы.

Профессор интервенциялық кардиологияны дамытуға, атап айтқанда, «шетінен шетіне» (TEER) әдісімен митральды қақпақты транскатетерлік реконструкциялау технологияларын клиникалық тәжірибеге енгізу мен дамытуға, сондай-ақ митральды қақпақты транскатетерлік реконструкциялаудың жаңа жүйесін әзірлеуге және оны клиникалық тәжірибеде алғаш қолдануға елеулі үлес қосты.

Шеберлік класы аясында институттың интервенциялық кардиологтары, кардиохирургтері және басқа да мамандары тәжірибе алмасты.

Қатысушылар профессордың «Клиникаға бағдарланған инновациялық тәжірибе» тақырыбындағы дәрісін тыңдады. Дәріс барысында ол митральды қақпақты транскатетерлік реконструкциялаудың жаңа жүйесін (TEER) әзірлеу және клиникалық тәжірибеге енгізу бойынша тәжірибесімен бөлісті. Мамандар жүйені қолданудың техникалық және клиникалық аспектілерін талқылап, операция жасау үшін пациенттерді іріктеді.

Бүгінде жүректің құрылымдық аурулары ашық жүрек операциясынсыз ақауларды қалпына келтіруге және жоюға мүмкіндік беретін заманауи аз инвазивті және эндоваскулярлық әдістердің көмегімен емделеді.

КІА ҒЗИ рентгенэндоваскулярлық операциялық бөлімінің меңгерушісі Алексей Евгеньевичтің айтуынша, митральды қақпақты «шетінен шетіне» (TEER) әдісімен транскатетерлік реконструкциялау – кеуде қуысын тіліп ашуды және жасанды қанайналымды қажет етпейтін, ауыр митральды регургитацияны (қақпақ жеткіліксіздігін) емдеуге қолданылатын аз инвазивті процедура. Жіңішке катетер аяқтағы сан венасы арқылы енгізіліп, жүрекке дейін жеткізіледі. Арнайы клипса (мысалы, MitraClip немесе DragonFly жүйесі) митральды қақпаққа жеткізіліп, оның алдыңғы және артқы жармаларын орталық бөлігінде «шетінен шетіне» қағидаты бойынша біріктіреді. Жармалар бекітіліп, нәтижесінде қанның кері ағуы (регургитация) азайып, жүректің қалыпты қызметі қалпына келеді. Пациенттер тез оңалып, операциядан кейінгі келесі күні-ақ аяққа тұрып кетеді.

«Бұл операцияның ерекшелігі - ол контрастсыз жүректің ультрадыбыстық бақылауымен жасалады. Өңеш арқылы ультрадыбыстық зерттеуді қолдана отырып, біз жүректің құрылымын толығырақ зерттейміз. Митральды қақпақшаның 3D бейнесін қолданып, қысқышты керек жерге орналастырамыз», - дейді институттың функционалдық және ультрадыбыстық диагностика бөлімінің меңгерушісі Ақжан Қонысбекова.

TEER операциялары хирургиялық тәуекелі жоғары, классикалық ашық жүрек операциясына қарсы көрсетілімі бар 4 пациентке жасалды.

Мұндай іс-шаралар кәсіби ынтымақтастықты дамытуға, білім және тәжірибе алмасуға, жүректің құрылымдық ауруларын емдеудің заманауи технологияларын енгізуге ықпал етеді. Сонымен қатар, олар мекемелер арасындағы ғылыми және клиникалық ынтымақтастықтың негізін қалыптастырады.