Самирхон Абабакиров таеквондодан Қытайдағы турнирде күміс медаль жеңіп алды

Самирхон Абабакиров Қытайдың таеквондодан Тайань қаласында өтіп жатқан World Taekwondo President’s Cup – Asian Region халықаралық турнирінде күміс медаль жеңіп алды, деп хабарлайды Skifnews.kz ақпарат порталы.

Ол 63 келіге дейінгі салмақ дәрежесінде сәтті өнер көрсетті.

Алғашқы белдесуінде ол отандасы Дулат Әбдімәлікті жеңіп, ширек финалда тайбэйлік Хуанг Чо Ченгті сенімді түрде ұтты. Жартылай финалда Самирхон Оңтүстік Корея өкілі Жанг Жабиннен басым түсіп, финалға жолдама алды.

Финалда қазақстандық спортшы әлем чемпионатының күміс жүлдегері, Азия ойындарының жеңімпазы – оңтүстіккореялық Джун Джанға есе жіберді.

Айта кетейік, қазіргі таңда Қазақстан құрамасының еншісінде үш медаль бар. Бұған дейін Батырхан Төлеуғали (80 келіге дейін) мен Әзиза Қаражанова (53 келіге дейін) қола жүлдеге ие болған еді.