Елде жақын күндері ауа райы күрт өзгереді

Синоптиктер 17, 18 және 19 қыркүйекке арналған ауа райы болжамын жариялады. Оған сәйкес елде жақын күндері ауа райы күрт өзгереді, деп хабарлайды Sn.kz ақпарат порталы.

Температураны төмендетіп, жауын-шашынды тоқтатқан антициклоннан кейін ел аумағына циклон жылжи бастайды.

«Республиканың басым бөлігінде жауын-шашынның тоқтап, ауа температурасының төмендеуіне себеп болған антициклонның артынан еліміздің батыс, кейін солтүстік өңірлеріне жаңбыр, найзағай және екпінді жел алып келетін циклон жылжи бастайды», – делінген хабарламада.

Ал республиканың оңтүстігінде Өзбекстан аумағынан келетін жылы ауа массаларының ықпалымен жауын-шашынсыз, негізінен жылы ауа райы сақталады.

• 17 қыркүйекте елордада көшпелі бұлт шығады, жауын-шашынсыз. Ауа температурасы түнде +6…+8°С, күндіз +23…+25°С көрсетеді.
• 18 қыркүйекте де көшпелі бұлт сақталып, жауын-шашын болмайды. Түнде +12…+14°С, күндіз +23…+25°С.
• 19 қыркүйекте көшпелі бұлт шығып, жаңбыр жаууы күтіледі. Ауа температурасы түнде +11…+13°С, күндіз +19…+21°С болады.

Алматы

• 17 қыркүйекте Алматыда көшпелі бұлт шығады, жауын-шашынсыз. Түнде температура +12…+14°С, күндіз +25…+27°С болады.
• 18 қыркүйекте де жауын-шашынсыз, құрғақ ауа райы күтіледі. Түнде +12…+14°С, күндіз +27…+29°С.
• 19 қыркүйекте де көшпелі бұлт сақталып, жауын-шашын болмайды. Түнде температура +13…+15°С, күндіз +29…+31°С-қа дейін көтеріледі.

Шымкент

• 17 қыркүйекте қалада көшпелі бұлт шығады, жауын-шашынсыз. Түнде температура +14…+16°С, күндіз +28…+30°С.
• 18 және 19 қыркүйекте де жауын-шашын күтілмейді. Түнде +16…+18°С, күндіз +30…+32°С болады.