Аиданың артында үш баласы қалды. Олардың ең кішісі небәрі үш жаста және ерекше күтімді қажет етеді.
Астана қаласында үш баланың анасы көзге жасалған операциядан кейін көз жұмды. Марқұмның туыстары әйелдің өліміне медицина қызметкерлерінің салғырттығы себеп болуы мүмкін деп күдіктеніп отыр. Бұл туралы Informburo.kz хабарлады, деп жазады Sn.kz ақпарат порталы.
Қайғылы оқиға 2025 жылғы 31 қазанда болған. Аида Оспанова көз ауруларын емдейтін жекеменшік клиникаға жоспарлы операцияға барған. Жақындарының айтуынша, бастапқыда жарты сағатқа созылатын ота жоспарланған. Алайда операцияға бір сағат қалғанда дәрігерлер науқаста қосымша катаракта бар екенін айтып, оны да бір мезетте алып тастау туралы шешім қабылдаған.
Отадан кейін әйелдің жағдайы күрт нашарлаған. Жедел жәрдем шақырылып, науқас басқа медициналық мекемеге жеткізілгенімен, дәрігерлер оның өмірін сақтап қала алмаған.
Марқұмның қызы Ақерке Әкімханованың айтуынша, отбасы сот-медициналық сараптаманың қорытындысымен келіспейді.
«Қорытындыда өлім себебі жүректің жедел тамырлық жеткіліксіздігі деп көрсетілген. Алайда анам бұрын жүрегіне байланысты ешқандай шағым айтпаған. Қолымызда операцияға дейін тапсырылған барлық таза талдаулар бар», – дейді ол.
Туыстарының күдігін күшейткен тағы бір жайт – медициналық құжаттарда өлім уақытының әртүрлі көрсетілуі. Марқұмның қызы Әмина Әкімханованың сөзінше, бір құжатта биологиялық өлім 16:18-де тіркелсе, екіншісінде басқа уақыт көрсетілген.
«Құжаттардың бірінде 16:48, екіншісінде 16:18 деп жазылған. Ал бізге 17:11-де хабарласқанда клиникалық өлім деп айтылды. Егер дәрігерлердің кінәсі дәлелденсе, олардың заң алдында жауап бергенін қалаймыз», – дейді ол.
Ал жекеменшік клиника өкілдері операция жоспарға сай өткенін мәлімдеді. Клиника директоры Ақмарал Ағалеуованың айтуынша, хирургиялық кезеңде асқыну болмаған.
«Операция қалыпты өтті. Алайда одан кейін науқастың жағдайы кенеттен нашарлады. Дереу жедел жәрдем шақырылып, ол Теміржол ауруханасына жеткізілді. Өлім себебін біздің клиника анықтай алмайды. Қайтыс болу фактісі медициналық ұйым аумағында тіркелген жоқ», – деді ол.
Клиника тарапы оқиғаға қатысты барлық медициналық құжаттар мен материалдар құқық қорғау органдарына тапсырылғанын хабарлады. Сонымен қатар әйелдің көз жұмғанынан кейін клиника аумағында ішкі тексеріс жүргізілмегені белгілі болды.
Ал марқұмның туыстары істің толық әрі объективті тергелмей қалуынан қауіптеніп отыр.
Аиданың артында үш баласы қалды. Олардың ең кішісі небәрі үш жаста және ерекше күтімді қажет етеді.