Петропавлда ауруханаға бет алған зейнеткер аязға шыдамай үсіп қайтыс болды

14 қаңтар күні 75 жастағы әйел Петропавл қаласындағы 314-ші Атқыштар дивизиясы көшесіндегі үйінен шығып, ауруханаға бет алған, бірақ қайта оралмаған. Оның ұялы телефоны өшірулі болған, деп хабарлайды Sn.kz ақпарат порталы. 

Іздеу жұмыстарына 60-тан астам адам жұмылдырылды, алайда қатты аяз бен түнгі қараңғылық салдарынан әйелді табу мүмкін болмады.

15 қаңтар күні таңертең учаскелік полиция қызметкері оны аурухананың шаруашылық корпусы маңындағы қоршаудың жанынан тапты. Әйел қатты тоңып, ауыр жағдайда болған, сөйлей алмаған. Ол дереу дәрігерлерге жеткізілді, бірақ өмірін сақтап қалу мүмкін болмады.

Аталған дерек бойынша қылмыстық іс қозғалды. Полиция тұрғындарды, әсіресе бағдарын жоғалтуы мүмкін қарт туыстарына мұқият қарауға шақырады.