Әлеуметтік желілерді қолданбайды: Жанабыловтардың үйқамақтағы шынайы шарты белгілі болды

Астананың қылмыстық істер жөніндегі ауданаралық сотында блогерлер Ерболат Жанабылов пен Эльмира Төлегеноваға қатысты бұлтартпау шарасының шарттары белгілі болды. Айыпталушылар 2026 жылдың 2 ақпанынан бері үйқамақта отыр, сот бұл шараны өзгеріссіз қалдырған.

Қорғаушы тараптың түсіндіруінше, үйқамақ талаптарына сәйкес ерлі-зайыптылар тек кешкі сағат 22:00-ден таңғы 07:00-ге дейін үйде болуы тиіс. Қалған уақытта сыртқа шығуға рұқсат берілген. Осыған байланысты олардың балаларын ойын-сауық орындарына апаруы немесе сауда орталықтарына баруы заң бұзушылық болып саналмайды.

Сондай-ақ сотта айыпталушыларға электронды бақылау білезігі тағылмағаны айтылды. Қорғаушының сөзінше, мұндай құралды тергеу органы қамтамасыз етпеген.

Бұдан бөлек, сотталушыларға телефон мен WhatsApp мессенджерін пайдалануға рұқсат бар. Алайда іс бойынша қатысушы тұлғалармен байланыс жасауға тыйым салынған. Қазіргі уақытта олар әлеуметтік желілерді қолданбайтыны да айтылды.