Федерация басшысының айтуынша, тыңдаулар барысында спортшыға көптеген сұрақ қойылған.
Қазақстан кәсіпқой бокс федерациясының президенті Рахымжан Ерденбеков допингке қатысты іс бойынша тыңдаулар өтіп жатқан кезеңде IBF және WBO тұжырымдары бойынша әлем чемпионы Жәнібек Әлімханұлының жекпе-жектерге қатысуына уақытша тыйым салынғанын мәлімдеді, деп хабарлайды Sn.kz ақпарат порталы.
Федерация басшысының айтуынша, тыңдаулар барысында спортшыға көптеген сұрақ қойылған.
Сәуір айынан бастап Жәнібектің тыйым салынған зат анықталғанға дейінгі бүкіл жолы егжей-тегжейлі қаралды. Кеше жаңа деректер белгілі болды, алайда оларды әзірге жариялай алмаймын. Тыңдаулар 23 қаңтарда жалғасады, — деді Ерденбеков.
Оның сөзінше, істі қарау қорытындысы бойынша барлық материалдар тиісті халықаралық ұйымдарға, соның ішінде IBF пен WBO ұйымдарына жолданады. Чемпиондық белбеулерден айыру немесе айырып алмау жөніндегі түпкілікті шешімді дәл осы ұйымдар қабылдайды. Ал әзірге Жәнібек Әлімханұлы тыңдаулар аяқталғанға дейін жекпе-жектерден шеттетіліп отыр.
Еске сала кетейік, өткен жылдың желтоқсан айында қазақстандық боксшының допинг сынамасынан антидопинг ережелерімен тыйым салынған мельдоний препараты анықталған. Осыған байланысты оның кубалық боксшы Эрисланди Ларамен үш бірдей әлем чемпиондық белбеуі үшін өтуі тиіс жекпе-жегі кейінге қалдырылды. 8 қаңтарда ашылған «В» сынамасы тыйым салынған заттың бар екенін қайта растады.