Жеңіліс көрмеген боксшы Теренс Кроуфорд мансабын аяқтайтынын мәлімдеді

Кәсіпқой бокста жеңіліссіз өнер көрсеткен америкалық боксшы, pound-for-pound рейтингінің көшбасшысы Теренс Кроуфорд спорттық мансабын аяқтау туралы шешім қабылдады. Бұл жөнінде 38 жастағы спортшы өзінің YouTube-арнасында ресми түрде хабарлады. Бұл туралы Sn.kz ақпарат порталы жазады.

Кроуфордтың кәсіпқой бокстағы рекорды — 42 жекпе-жек, 42 жеңіс, оның 31-і нокаутпен. Ол ұзақ жылдар бойы әлемдік бокстың символына айналып, бірнеше салмақ дәрежесінде чемпион атанды.

Боксшы шешімін терең мағыналы сөздермен түсіндірді. Оның айтуынша, бұл кету — әлсіздік емес, керісінше ішкі жеңіс:

«Мен жарысты тоқтатып отырған жоқпын, мен басқа бір шайқаста жеңіске жеттім. Ол — өз шарттарыммен кету», — деді Теренс Кроуфорд.

Спортшы мансабында атақ пен қаржыны емес, өзін дәлелдеуге деген ішкі қажеттілікті басты мақсат еткенін атап өтті. Ол отбасына, туған қаласына және бір кездері қолында тек арманы мен бокс қолғаптары ғана болған балаға арнап жұдырықтасқанын айтты.

Кроуфорд бокстың өзіне бәрін бергенін, ал енді бұл спортта дәлелдейтін ештеңе қалмағанын жеткізді. Дегенмен ол бұл қоштасу емес екенін де ерекше атап өтті:

«Бұл — бір жекпе-жектің соңы ғана. Ал алда жаңа кезең басталады».

Айта кетейік, Теренс Кроуфорд бокстан кеткенімен, оның спорттағы және жанкүйерлер жадындағы орны ерекше болып қала бермек.