«Яндекс» қосымшалары істен шықты: такси жүргізушілері мен курьерлер табыссыз қалды

«Яндекс» компаниясының курьерлерге, такси жүргізушілеріне және басқа да қызметкерлеріне арналған ішкі қосымшалары дата-орталыққа жасалған шабуылдан кейін жұмысын тоқтатты,  деп хабарлайды Sn.kz ақпарат порталы.

Бұл туралы «Осторожно, новости» Telegram-арнасы хабарлады.

Арнаның мәліметінше, такси жүргізушілері мен курьерлер жұмысқа тіркеліп, тапсырыстарды қабылдайтын «Яндекс Про» қосымшасына кіре алмай отыр. Компанияның қолдау қызметі мамандары да жүйедегі ақауларға байланысты қиындықтарға тап болған.

Қызметкерлердің бірі арнаға берген сұхбатында арнайы бағдарламаның істен шыққанын, соның салдарынан жұмыс сервистері де қолжетімсіз болғанын айтты.

«Бізде арнайы бағдарлама бар еді, ол істен шықты, жұмыс сервистері де жұмыс істемей тұр. Ең қызығы, мен тіпті қате туралы есеп те жібере алмаймын», — деді ол.

Қызметкердің сөзінше, еңбекақы орындалған жұмыс көлеміне қарай есептеледі. Сондықтан қосымшалардың қайта іске қосылуын күту оған табысынан айырылуға әкеліп отыр.

Қазіргі уақытта сервистердің қашан толық қалпына келетіні туралы ақпарат берілген жоқ.