Технологиядан спорттық білімге: EU Reporter Нұрасыл Медеудің жобалары туралы жазды

Еуропалық EU Reporter басылымы Нұрасылдың кәсіби жолы және оның Қазақстанда спорттық білім берудің жаңа моделін қалыптастыру бағытындағы жұмысы туралы материал жариялады. Бұл жұмыстың маңызды нәтижелерінің бірі — 2023 жылы «Спорт» бағытының Қазақстанның жоғары білім беру мамандықтары жіктеуішіне алғаш рет енгізілуі, деп хабарлады SN.kz ақпарат порталы.

EU Reporter басылымында жарық көрген From Tech to Sport: How Nurassyl Medeu Is Building a New Education Model in Kazakhstan («Технологиядан спортқа: Нұрасыл Медеу Қазақстанда білім берудің жаңа моделін қалай қалыптастырып жатыр») атты мақалада оның кәсіби жолы, спорттық білім беруді дамыту жөніндегі бастамалары және Қазақстанда заманауи университет моделін қалыптастыру жұмысы баяндалады.

2023 жылы Нұрасылдың бастамасымен «Спорт» бағыты Қазақстанның жоғары білім беру мамандықтары жіктеуішіне алғаш рет енгізілді. Бұл қадам спортты тек кәсіби спортшылар даярлайтын сала ретінде ғана емес, менеджмент, спорт ғылымы, технология, аналитика және басқа да бағыттар бойынша мамандарды қажет ететін дербес білім беру әрі кәсіби сала ретінде қарастыруға мүмкіндік берді.

EU Reporter материалында сипатталған білім беру моделінің негізінде де осы тәсіл жатыр.

Технологиядан спорттық білімге

Нұрасылдың кәсіби жолы технология саласынан басталды. Ол Бостон университетінде Computer Science мамандығы бойынша бакалавр дәрежесін алды. Оның академиялық дайындығы жасанды интеллект, деректерді талдау, киберқауіпсіздік және бағдарламалық инженерия бағыттарын қамтыды.

EU Reporter жарияланымында атап өтілгендей, бұл тәжірибе кейін оның спорттың цифрлық трансформациясына, сондай-ақ спорт индустриясын дамытуда деректерді, аналитика мен технологияларды пайдалануға деген қызығушылығын қалыптастырды.

Нұрасылдың айтуынша, АҚШ-тағы университеттік орта оның заманауи білім беру туралы көзқарасына елеулі әсер еткен.

Оның пікірінше, бүгінгі университет тек диплом беретін оқу орны емес, білім, технология, бизнес пен индустрияны бір ортада тоғыстыратын кеңістік болуы керек. Сонымен қатар мақсат шетелдік жүйені тікелей көшіру емес, үздік халықаралық тәжірибелерді Қазақстан жағдайына бейімдеу болды.

Халықаралық тәжірибеге негізделген қазақстандық модель

EU Reporter жарияланымының елеулі бөлігі KNUS-тың дамуына арналған.

Университет моделін қалыптастыру барысында Ұлыбританиядағы Лафборо университеті мен Германиядағы Кёльн спорт университетін қоса алғанда, әлемнің жетекші спорттық жоғары оқу орындарының тәжірибесі зерттелді.

Нұрасыл атап өткендей, бұл университеттер білім беру, ғылыми зерттеу және кәсіби тәжірибені өзара ұштастыру тәсілімен маңызды бағдарға айналды.

Сонымен бірге KNUS бастапқы кезден-ақ Қазақстан мен Орталық Азияның қажеттіліктерін ескере отырып құрылды. Оның міндеті — халықаралық стандарттарға бағдарлана отырып, өңірге қажетті құзыреттерді, зерттеу әлеуетін, технологиялар мен кәсіби сараптаманы дамыту.

260 студенттен 5 мыңнан астам білім алушыға дейін

EU Reporter білім беру жобасының даму динамикасына да назар аударады.

2022 жылға қарай APEMS-те бакалавриат бағдарламалары бойынша 260 студент білім алған. Сұхбатта келтірілген мәліметтерге сәйкес, бүгінде білім алушылар саны 5 мыңнан асады.

Осы уақыт ішінде академиялық команда кеңейіп, университеттің өзіндік білім беру бағдарламалары әзірленді, заманауи зертханалар құрылды, сондай-ақ халықаралық университеттермен және ұйымдармен байланыстар нығайды.

Нұрасылдың түсіндіруінше, APEMS-тен KNUS-қа өту білім беру жобасының ауқымды трансформациясын көрсетеді.

Өңірлерден келген студенттерге арналған мүмкіндіктер

Сұхбаттағы жеке тақырыптардың бірі — дарынды студенттерді қолдауға бағытталған Life Chance және Merit бағдарламалары.

Life Chance бағдарламасы, соның ішінде, ауылдық және шалғай өңірлерден келген жастарға, сондай-ақ әлеуметтік осал топтардың өкілдеріне бағытталған.

Мақала шетелдік eureporter.co басылымында жарияланған.