Астанада ер адам аялдамадан өтіп кеткені үшін автобус әйнегін сындырған (ВИДЕО)

Астана полицейлері қоғамдық көлік мүлкіне зиян келтірген ер адамды анықтады, деп хабарлайды Sn.kz ақпарат порталы. 

Полицияға қалалық автобустардың бірінде жолаушы жанжал шығарып, жүргізуші кабинасын салоннан бөліп тұрған әйнекті сындырғаны туралы хабарлама түскен.

Тексеру барысында құқық бұзушының 44 жастағы ер адам екені анықталды. Белгілі болғандай, жанжалға автобустың өзі түсуі тиіс аялдамаға тоқтамай, өтіп кетуі себеп болған. Осыған байланысты жолаушы жүргізушімен сөзге келіп, кейін ашуға бой алдырып, жүргізуші кабинасын салоннан бөліп тұрған әйнекті жұдырығымен ұрып, сындырып жіберген. Ұсақ бұзақылық жасағаны үшін ер адам әкімшілік жауапкершілікке тартылды. Соттың қаулысымен оған 20 тәулікке әкімшілік қамақ жазасы тағайындалды. Сонымен қатар, ол келтірілген материалдық шығынды өтеуге міндеттелді, - деп хабарлады Астана қаласының ПД баспасөз қызметі. 

Полиция кез келген даулы жағдайды заң аясында шешу қажеттігін ескертеді. Агрессивті әрекеттер, бөтеннің мүлкіне зиян келтіру және қоғамдық тәртіпті бұзу Қазақстан Республикасының заңнамасына сәйкес жауапкершілікке әкеп соғады.