Алматыда балалар арбасына дәрет сындырған курьердің жеке басы анықталды

Алматы қаласындағы тұрғын үй кешендерінің бірінде тұрған балалар арбасына өтіп бара жатқан курьер дәрет сындырып кеткен. Полиция қызметкерлері курьердің жеке басын анықтады, деп хабарлайды Sn.kz ақпарат порталы.

Оқиғаның видеосы әлеуметтік желіде жарияланып, желі қолданушылары арасында резонанс тудырды.

Azattyq Rýhy тілшісі оқиға бойынша Алматы қаласының Полиция департаментіне сауал жолдап, мынандай жауап алды:

«Алматы қаласының Полиция департаменті қаладағы тұрғын үй кешендерінің бірінде болған құқыққа қайшы әрекетке байланысты Алмалы аудандық полиция басқармасы тексеру жүргізгенін хабарлайды. Ер адамның жеке басы анықталды. Қазіргі уақытта полиция қызметкерлері оның орналасқан жерін анықтап, ұстау бойынша шаралар қабылдап жатыр. Нәтижесінде оның әрекетіне құқықтық баға беріліп, заңнамаға сәйкес жауапкершілікке тартылады. Мұндай фактілерге жол беруге болмайды, олар қоғамдық тәртіп нормаларын өрескел бұзады және азаматтардың орынды наразылығын тудырады», – делінген агенттік тілшісіне берген жауабында.

Алматы полициясы тұрғындарды қарапайым мінез-құлық қағидаларын сақтауға және айналасындағыларға құрметпен қарауға шақырады.