Бұл жағдайға Ақтөбе қаласының әкімі Азамат Бекет пен облыс әкімі Асхат Шахаров жауапты екені айтылды.
Ақтөбе қаласындағы «Тұран» тұрғын алабының тұрғындары сегіз жылдан бері орталықтандырылған ауыз суға қол жеткізе алмай отыр. Жер телімдері шамамен сегіз жыл бұрын берілгеніне қарамастан, бүгінге дейін 500-ден астам отбасы ауыз суды тасып ішуге немесе сүзгі арқылы пайдалануға мәжбүр. Тұрғындардың айтуынша, бүкіл ауданға бір ғана су алатын колонка орнатылған, алайда одан алынатын су ішуге жарамсыз. Қала әкімдігі бұл мәселені жасырмайды. Шенеуніктердің сөзінше, қаладағы қолда бар су қоры жаңа тұрғын алаптарын толық қосуға жеткіліксіз. Ал тұрғындарды ең алаңдататыны – жылдар бойы шешілмей келе жатқан қарапайым мәселе. Жер берілген, үйлер салынған, бірақ тіршілікке ең қажет – таза ауыз су әлі жоқ. Бұл жағдайға Ақтөбе қаласының әкімі Азамат Бекет пен облыс әкімі Асхат Шахаров жауапты екені айтылды.