"Ең ауыр нәрсе — баламның қайда екенін білмеу".
Атырауда былтыр күзде жоғалып кеткен 23 жастағы Яна Легкодимованы өлтірді деген күдікпен ұсталған екі жігіттің ісі сотқа жолданды. Бұл туралы бүгін полиция хабарлады, деп жазады Skifnews.kz ақпарат порталы.
Ақпаратты марқұмның анасы да растады. Оның айтуынша, сот отырысының нақты күні кейін белгілі болады. Яна 2023 жылдың қазан айында із-түзсіз кеткен. Біраз уақыт өткен соң полиция 24 және 25 жастағы екі жігітті ұстады. Тергеу кезінде олар қызды тұншықтырып өлтіргенін және денесін Жайық өзеніне тастағанын айтқан. Қылмыстың нақты себебі әзірге жарияланған жоқ — бұл деректер сот процесінде белгілі болмақ.
Ең қиыны — қыздың денесі әлі күнге дейін табылған жоқ. Тергеу органдарының айтуынша, өзен мен жағалаулар бірнеше мәрте тексерілген, бірақ нәтиже болмаған. Соған қарамастан іс сотқа жіберілді. Мұндай жағдайлар Қазақстанда өте сирек кездеседі. Дегенмен заңгерлердің айтуынша, мәйіт болмаса да, егер жеткілікті айғақтар — мойындау, куәгерлердің сөзі және басқа дәлелдер — болса, сот үкім шығара алады.
“Ең ауыр нәрсе — баламның қайда екенін білмеу. Қоштаса алмадым. Бірақ мен әділдікке сенемін. Денесі табылмаса да, әділет салтанат құруы тиіс”, — дейді Янаның анасы Галина Легкодимова.