"Мен де тік мінезді адаммын".
Қазақстанның халық әртісі Мақпал Жүнісова «Сенбілік серуен» бағдарламасына берген сұхбатында марқұм жұбайы Заманбек Нұрқаділов туралы әсерлі естелігімен бөлісті, деп хабарлайды Sn.kz ақпарат порталы.
Әншінің айтуынша, олардың отбасылық өмірінің алғашқы жылдары оңай болмаған.
«Ол кісі әйел адамның өзіне қарсы шыққанын тіптен жек көретін адам екен. Керемет болдым деп айта алмаймын. Басындағы 1-2 жыл ит пен мысық сияқты өмір сүрдік. Мен де тік мінезді адаммын. Бетіне айтып тастайтынмын. Солай айттың деп, 2-3 күн сөйлеспей қоятын. Ол кісі мені тәрбиеледі, кішкене жынымды басты», – деді Мақпал Жүнісова.
Бұған дейін әнші Кегендегі марқұм жұбайының ескерткішіне барып, гүл қойып құрмет көрсеткен еді. Сол сәттің видеосын да әлеуметтік желідегі парақшасында жариялаған.
«Кегендегі мектепке атын беріп, бір бөлмесінде Зәкеңе арнап мұражай жасапты, соған Зәкеңнің біраз дүниесін табыстап кеттім. Кегендік әкімшілікке көп рақмет!», – деп жазды өнер иесі.
Әлеуметтік желі қолданушылары әншінің бұл қадамынан әсерленіп, жылы пікірлерін қалдырды.