ОПЕК+ жаңа ғана нарықты құлдыратты.
Қазақстан мұнай өндіру квотасын бұзудың салдарынан құтыла алмайды, деп хабарлайды Skifnews.kz ақпарат порталы.
Мамыр айында ОПЕК+ ұйымының сегіз негізгі елі мұнай өндіруді тәулігіне бірден 411 мың баррельге арттырды. Бұл өткен аймен салыстырғанда үш есе көп. Себеп – қорлардың тапшылығы және Brent маркалы мұнай бағасының төмендеген (59 доллардан).
ОПЕК+ құрамында 22 мемлекет бар. Олардың тек сегізі ғана қатаң шектеулерді сақтайды. Енді солардың қатарындағы Ресей, Сауд Арабиясы және БАӘ қысымды азайтып, өндірісті ұлғайтуға шешім қабылдаған.
Мұнай өндіруді ең көп арттыратын ел – Сауд Арабиясы. Bloomberg мәліметінше, аталған мемлекет Қазақстанды квоталарды бұзғаны үшін жазалап, АҚШ-қа жан-жақты диалогқа дайын екенін білдіргісі келеді. Бұл, әсіресе, Дональд Трамптың алдағы сапары аясында маңызды.
Арабтар Астананы жазалау науқанын жүргізіп жатыр
Мұнай экспорттаушы елдердің кезекті отырысы 5 мамырда онлайн форматта өтеді. Ұйымға мүше елдер осы кездесуде 2025 жылғы маусым айында өндірілетін мұнай көлемін анықтайды.
Мұнай трейдерлерінің пікірінше, Сауд Арабиясы алдағы дүйсенбіде OPEC+ елдерін өндірісті ұлғайтуға көндіреді. Себебі арабтар картелдің тәртіп бұзған мүшелерін жазалау науқанын жүргізіп жатыр деп жазды агенттік.
Bloomberg зерттеуіне қатысқан трейдерлер мен сарапшылардың 60%-ы ұйымның ықпалды мүшелері Сауд Арабиясының уәжіне келіседі деп есептейді.
Әзірге ұйым мұнай өндірісін нақты қаншаға арттыруы мүмкін екені белгісіз, бірақ түрлі болжамдар айтылып жатыр. Мәселен, бір ай бұрын OPEC+ 2025 жылғы мамырда бір тәуліктегі өндірісті 411 мың баррельге дейін арттырып, трейдерлердің есін шығарған. Артынша әлем нарығында «қара алтын» құны күрт құлдыраған. Сол кезде картел өкілдері осындай шешім қабылдауға Қазақстанның квотаны сақтамауы себеп болғанын айтқан.
Мұнай трейдерлерінің айтуынша, Эр-Рияд осындай қадамға АҚШ президенті Дональд Трамппен байланысын нығайту үшін де баруы мүмкін. Ақ үй басшысы мұнай экспорттаушыларды отын құнын түсіруге үгіттеп жүр. Оның үстіне, Трамп Иранмен ядролық келісімге отыруға мәжбүрлеп жатыр. Сауд Арабиясы Иранның мұнай экспорты қайда өркендегенін қаламайды. Сол себепті арабтар Құрама Штаттар басшысының көңілін табуға тырысады.
Қазақстан және мұнай
Сәуірдің соңғы күні әлем нарығында мұнай қайтадан арзандады. Brent маркалы мұнайдың бір баррелі 63 доллардан төмен түсіп кетті. Мұнай әлем нарығында қатты арзандаса, оның зардабын Қазақстан экономикасы тартады.
Бұған дейін Қазақстанның энергетика министрі Ерлан Ақкенженов ұлттық мүдде OPEC+ алдындағы міндеттерден жоғары деп мәлімдеген. Қазақ министрінің бір ғана осы сөзі мұнайдың арзандауына алып келген.
Трамп мұнай құнын 40 долларға дейін түсіруге уәде берген. Бұған дейін Goldman Sachs сарапшылары мұнай 40 долларға дейін арзандауы мүмкін деп болжаған.
Айта кетейік, Қазақстанның 2025 жылға арналған бюджетінде мұнайдың бір баррелі 75 доллар деп есептелген. Әлем нарығында мұнай арзандаған сайын ұлттық валюта – теңге құнын жоғалтатын жағымсыз үрдіс бар.
ОПЕК+ жаңа ғана нарықты құлдыратты. Сауд Арабиясы Қазақстанды жазалауға және Трамптың бағаны төмендету талабын қолдауға ұмтылып жатыр, — деп келтіреді Bloomberg Rystad Energy компаниясының сарапшысы Хорхе Леонның сөзін.
Сарапшылар мұнай бағасы онсыз да төмендеп жатқандықтан, егер ОПЕК+ нарыққа барлық резервтік қуатымен шықса, бұл құлдырауға – барреліне 20 долларға дейін әкелуі мүмкін екенін ескертеді. Сондықтан альянс елдері нарық конъюнктурасы айтарлықтай өзгерсе, белсенділікті азайтуға дайын.
Бұған дейін Қазақстан ОПЕК+ форматы аясындағы халықаралық міндеттемелерді бұлжытпай сақтауға бейілді екенін растаған еді.